Ar bern bras kentañ

 War ar stern eo ar bern bras !

Kroged e oa bet  krouiñ ur bern bras àr an enezenn e-kreiz e miz an Avent 2015. Lakaed en deus J. pifonoù houarn 2 vetr hirder ha  o sanket en deus e-barzh an douar (kentoc'h traezh ha maen) bep 60 sm evid er harzañ (evel-se ne finvo ket). Goude-se, hon eus lakaet brankennoù bod-kelvez hon eus troc'hed war garzh ar perc'hennaj. D'ar su ez eus ur moger bihan graed gand maen  evit tapout tommder an heol hag evit kaout loened bihan e-barzh. Goude hon eus lakaet tammoù koat sec'h ha brein hon eus kaved er c'hoadoù e-tal al lec'h.

 Brankennoù bod-kelvez zo tro-dro d'ar bern

Tremen a-us d'an drival evid ar pesked gand ar garigelloù e oa hanez !

E-barzh, tammoù koad a bep seurt !
Edan he botez ar moger bihan tu su ar bern graet gant maen...

Disoc'h un devezh labour gand mignoned SEl  vro an Alre. D'an 13 a viz Genver 2016 e oa !

Ar bernioù kentañ

 Ar re-vihan kentañ

Kroued e oa bet ar bernioù kentañ durand an diskar-amzer e miz Gouel-Mikael war an enezenn gentañ d'un tu pe du d'an hent a ya d'ar rañvell pennañ. Unan a zo retered  d'ar Su-Reter e-kichen "saloñs er jardin", an hini all a zo doc'h ar Su. An daou a zo a-dreñv ur moger bihan graed e mein evit kemer tommder an heol ha roiñ bod d'al loened bihan evel al lazarded hag an orvedenned (kavet hon eus unan dija !). Al loened-se a zo gouest da chaseal ar melc'hwed !

 Setu an hini kentañ e lec'h e oa bet lakaed ur muzuller glav hag a zo pouezus-tre evit regliñ ar ranvelloù reve kementad ar glav. E miz Gouel-Mikael hon eus plantet sivi, irvin du pe roz, plantoù c'hwezek ha tout an draoù-se a zo kolled etre plouz ha foen evit tremen ar gouañv.

Retered eo an eil bern tu dehou ar rañvell pennañ, doc'h ar Su. Er foñs ez eus ur garzh graet get beuz war bord an hent a-us. An traoù gwenn àr al leur a zo kroguennoù istr evit kerzhoud warne...

Saved eo an daou vern-se gant tammoù koat brein pe sec'h, del sec'h, douar-teilh ar c'hoadoù ag a zo bet dastumed e-kichen an hent a ya d'ar vilin, ha kaoc'h he deus roet deomp poneyez ar vilin "Likorn" eo he anv. Plouzed int gant foen, bezhin ha del glaz ur bod-oranjez ag ar Mexig hon eus troc'het just a-raok.



 Setu Likorn he deus debret tout ar foen ! Evit an eskemm, roiñ a ra deomp 2 sailh a gardell bemdez...

Stad al lec'h e miz Du 2015

A-raog krogiñ  ar jardin

Setu al lec'h gwelet dre ar pevare staj ag ar vilin e miz Du 2015
Tu zo gwelout an enezenn kentañ gand an daol hag ar gadorioù  war an enezennig  etre div rañvell













Setu ar vilin gwelet d'an traoñ. Adaozed eo bet al lec'h gant tourterioù evid ober un "tremen evid ar pesked" .












Setu an "tremen evid  ar pesked" nevez flamm araok bout douret.

D'ar 26 a viz Du e oa bet douret.

An enezennigoù hag a zo etre an hentoù dour a zo graet gant traezh granitek, maenioù, savennoù a bep seurt ha pri hag a zo bet kased er c'houlzioù a-raok. N'eo ket gwall vat evit gounit legumaj....

Istor al lec'h

Un istor hir en deus al lec'h evel e tiskouezh ar gartenn-bost mañ. E penn-kentañ ar XXet kantved e oa dija ul lenn. Etre an daou rañvell e oa un enezenn e-kreiz gant gwez-avaloù. Distrujed eo bremañ ar savadurioù ag ar XVIIet pe ar XVIIIet kantvet.

Unan ag ar milinoù nevez e oa. Bez e oa gwirioù da valañ a-houde 1756. D'an amzer-se e oa implijet kalz muioc'h a-vremañ bep lec'h e-kichen ar sterioù. Ar saout a yae da evañ an dour, gouniet e veze avaloù... Muioc'h a goulo e oa peogwir ne oa ket ken uhel a-vremañ ar gwez e-kichen ar ster.

 

War ar foto-mañ ez eus ur savadur get 3 staj savet e fin an XIXet kantvet. Distrujed e oa bet ar savadurioù bihan all. En ur stad mad eo c'hoazh ar fardell hag ar ranvelloù.

Labouret en deus betek 1990 ar vilin "Fraval" un embregerezh etre artizan hag ijinerezh. Goude eo bet gwerzhet d'ar "milinoù Paris" . Prenet en deus al lec'h  un den privez en ur soñjal talvoudekaad ul lec'h gand ur galloudezh energiezh ken pouezus. Goude ul labour netaat bras, lakaed en deus ar perc'henn div droigellez evit gounit tredan gand ur galloud 36 kW/e hag a zo bet igoret d'ar 27 a viz Du 2015.

Ur blog war ur jardin, perak ?

War ar blog nevez-mañ e vo komzet jardin.

• Jardinañ en un doare naturel war ul lec'h ispisial ha brav-tre : tro dro ster al Loc'h e-kichen ur vilin ag a zo adkampenet (n'eo ket echu al labour).
• Kroged hon eus labourad er jardin-se a-houde miz Gouel-Mikael 2015.
• Posubl  e vo deoc'h heuliañ ar pezh a zo bet graet hag a pezh e vo graet evit krouiñ ur jardin en ur mod naturel tost d'an hentenn "permakultur". 
• Implij a reomp ar muiañ posupl traoù adimplijet, nac'hiñ a reomp implij louzoù kimiek ha temzioù. Klask a ran implij an hadennoù m'eus produet pe m'eus eskemmet gant tudoù all ha n'implijan ket hadennoù F1.
• Evel-se m'eus c'houant diskouezh eo posupl jardinañ hep dispign argant, hep distruj ar vuhez naturel ha displeg d'an dud penaoz ober. E brezhoneg eo posupl !

Setu al lec'h e miz Du a-raog e oa leuniet al lenn hag a-raog e oa komenset d'ober ar jardin